Numbers 20
Suangpi Pan-a Tui
1A kha masa sungin Israel mihon buppi Zin Sehnel-gam tung uh a Kadesh ah a om uh hi. Tua lai-ah Miriam si-a a kivui hi. a 2 Tua lai-ah mipite ading tui om lo a, Moses le Aaron langpang dingin mite a kikhawm uh hi. 3Amaute Moses tawh kitawng uh a, “I sanggamte TOPA mai-ah a sih lai-un eite zong a si hizaw ta leng! 4Bang hangin kote le ka ganhingte uh hih lai-a si dingin TOPA mipite hih gam sungah hong paipih na hi hiam? 5Bang dingin Egypt panin hih a lauhuai mun hong tunpih na hi hiam? Hih munah an, thei, lenggui, le mang kawlsing om lo hi. Tua banah tui dawn ding nangawn om lopi!” a ci uh hi. b 6 Mipite lak panin Kikhopna Puanbuk lutna ah Moses le Aaron pai uh a, a mai kunsuk uh ciangin TOPA minthanna amau tungah kilang hi. 7TOPA in Moses tungah, 8“Tua ciangkhut la inla nang le na sanggampa Aaron in mipite kikhawmsak un. Amaute maitang ah suangpi hopih in, tui hong phulkhia ding hi. Mipite adingin suangpi panin tui na phulkhiasak dinga amaute le amaute’ gante in a dawn ding uh hi,” a ci hi. c 9 Tua ciangin ama thupiak bang tektekin Moses in TOPA omna panin ciangkhut a la hi. 10Amah le Aaron in suangpi mai tengah mihonpite kikhawmsak uh a Moses in amaute kiangah, “No a lehdote aw ngai un, hih suangpi panin no ading tui hong pia taktak buang lo ding ka hi uh hiam?” a ci hi. 11Tua ciangin Moses in a khut laamto a, a ciangkhutin suangpi nihvei a sat hi. Tui kikhawhkhia a mipite le amau gante in a dawn uh hi. 12 Ahi hangin TOPA in Moses le Aaron tungah, “Israel mipite muhna ah nong muan ding zahun hong muang loin a siangtho-in hong pahtawi lo na hi manun, amaute ka piakna gamah hih mipite na tunpih kei ding uh hi,” a ci hi. d 13 Hihte in Meribah a tuiphual-a, Israel-te in TOPA tawng uh a, amaute laka amah a siangtho-a a kilahna-a thupiang ahi hi.Israel Paina Edom in Nial
14 Moses in Kadesh panin Edom kumpipa kiangah kamtai sawl a: “Na sanggampa Israel in: Ko tunga hong tungsa haksatna khempeuh a thu na thei hi. 15Ka pute uh Egypt ah paisuk uh a, tua lai-ah kum tampi ka teng uh hi. Egypt mite in kote le ka pate uh hong bawlsia uh a, 16ahi hangin TOPA tungah ka kiko uh ciangin kote kikona amah in hong za a, van sawltak khat hong paisukin Egypt panin hong paikhiatpih hi. e“Tu-in kote na gamgi kianga khuapi khat Kadesh ah ka om uh hi. 17Nong hehpihna-in kote na gamsung kantanin hong paisak in. Lo lai khatpeuh ahikeh lenggui lo khatpeuh tawnin ka pai kei ding uh a, tuikhuk khatpeuha tui zong ka dawn kei ding uh hi. Kumpipa lam lianpi bek zui-in ka pai ding uh a, na gamgi ka tun matengun taklam ahi a veilam ahi zongin ka pial kei ding uh hi,” a cisak hi. f
18 Ahi hangin Edom in: “Hih lai nong kantan thei kei ding uh hi; nong pai teitei uh leh hong kuankhia-in namsau-in kong do ding uh hi,” ci-in a dawng hi. g
19 Israel-te in: “Lam lianpi zui bekin ka pai ding uh a, kote le ka ganhonte un na tui uh a dawn leh a man kong pia ding uh hi. Bangmah dang hi loin khe tawh kantanin a pai nuam bek ka hi uh hi,” ci-in a thuk kik uh hi. h
20 Amaute in: “Na kantan thei kei ding uh hi,” ci-in a dawng kik leuleu uh hi.
Tua ciangin amaute langah a thahat galkap tampi tawh Edom a kuankhia hi. 21Edom in amau gam kantan ding nial ahi manin amaute panin Israel kiheikhia hi.
Aaron Sihna
22 Kadesh panin Israel mipi bup dingkhia uh a, Hor Vum a tung uh hi. 23Edom gamgi gei Hor Vum ah, TOPA in Moses le Aaron tungah, 24“A mipihte tawh Aaron kigawmta ding hi; Israel-te ka piak gamah amah a lut kei ding hi, bang hang hiam cih leh Meribah tuiphualah note gel in ka thupiak na lehdo uh hi. 25Aaron le a tapa Eleazar samin amaute Hor Vum ah paipih in, 26Aaron puante suahsak inla a tapa Eleazar silhsak in; ahang in, Aaron a mipihte kiangah kigawm ta ding hi; tua lai-ah amah a si ding hi,” a ci hi. 27 TOPA thupiaksa bangin Moses in hih a; amaute mipite muhin Hor Vum tungah a kahto uh hi. 28Moses in Aaron puante suahsak a, a tapa Eleazar a silhsak hi. Tua ciangin tua lai mualdawn ah Aaron a si hi. Mualtung panin Moses le Eleazer kumsuk uh a, 29mihonpi bup in Aaron sih a theih uh ciangin ama hangin Israel innkuan buppi ni sawmthum sung a thum uh hi.
Copyright information for
ZomZIV